Ingabo za Israel zinjiye icese ku butaka bwa Libani kurwana na Hezbollah

Igisirikare ca Israel (IDF) gitangaza ko catanguye ibitero byo ku butaka “bitobito mu bibanza vyatoranijwe” kandi “hisunzwe amakuru atangwa n’igendereza” ku bigo n’ibibanza umuhari Hezbollah ukoreramwo mu bumanuko bwa Libani.

Mw’itangazo caraye gisohoye cemanga ku mugaragaro ibi bitero, igisirikare ca Israel kivuga ko ibi bibanza biriko biraterwa biri mu bigwati vyegereye urubibe kandi bikaba “bibangamiye abanyagihugu bo mu buraruko bwa Israel”.

Rivuga riti: “IDF iriko ikora ibitero ikurikije integuro yatunganijwe n’ibiro bikuru vya gisirikare hamwe n’ibiro vya gisirikare mu buraruko, abasirikare ba IDF bamaze imisi bavyitegurira kuva mu mezi make aheze”.

Ni mu gihe amakungu abandanya atera akamo ko hoba agahengwe, aho Perezida Joe Biden n’umushikiranganji w’Ubwongereza ajejwe imigenderanire David Lammy bashimangira akamo kabo k’uko hoba “inyishu iciye mu biganiro” kugira ngo ino mishamirano irangire.

Hagati aho, aka kamo gaterwa n’amakungu ntaco kabwiye Israel, aho igisirikare cayo kivuga ko “kibandanya gukora kugira ngo gishike ku ntego y’ino ntambara kandi gikora ibishoboka vyose mu gukingira abanyagihugu ba Israel no gusubiza mu zabo abanyagihugu bo mu buraruko bwa Israel”, nk’uko biri muri iri tangazo.

Kuva kera Hezbollah yamye ibangamiye uburaruko bwa Israel ariko kuva habaye ibitero vyo ku wa 7 Gitugutu umwaka uheze wa 2023, reta ya Israel n’igisirikare cayo ntivyari vyiteguriye kwihanganira aka gahahirizo ku rugero nk’urwo.

Igisirikare ca Israel kirwanira mu kirere kiragumirije umuriro ingabo zirwanira ku butaka mu gukora ibitero ntahusha ku bigo vya gisirikare biri mu karere.

Ubushikiranganji bwa Libani bujejwe amagara y’abantu butangaza ko abantu bababa 95 bishwe abandi 172 barakomereka muri ibi bitero vyo mu kirere vya Israel. Ni mu gihe abategetsi batangaza ko abantu barenga 1.000 ari bo bamaze kwicwa mu ndwi zibiri ziheze, nayo abarenga umuriyoni bakaba bamaze guta izabo.

Hezbollah ifise intego imaze igihe kirekire yo kwigarurira akarere k’Ubugalile (Galilée/Galilee) kari mu buraruko bwa Israel.

Israel iherutse kwerekana imiyoboro yo mu kuzimu yagutse cane yubatswe na Hezbollah yari gushobora kwinjiza amajana n’amajana y’abarwanyi bayo muri Israel mu kiringo c’iminota mikeya gusa.

Rero nubwo igisirikare cakubise bikomeye uburongozi bwa Hezbollah n’ibirwanisho vyayo bitari bike mu ndwi zibiri ziheze, vyaraboneka ko itarota ihagarika iyi ntambara idasambuye ibikoresho vya gisirikare, imyobo n’imiyoboro yo mu kuzimu y’uno muhari vyari bimaze gutegurwa hafi y’urubibe rwa Israel.

Iki ni co gikorwa caraye gitanguye nijoro, ariko Israel irazi ko kuva muri kahise kurungika ingabo muri Libani ni kimwe – kuzikurayo naho kikaba ikindi.

Hagati aho, nubwo uburongozi bwa Hezbollah bubangamiwe, ntibigaragara neza ingene ino ntambara hagati y’ingabo za Israel n’abarwanyi b’uno muhari bafise ibirwanisho bikomeye kandi bamenyereye intambara ishobora kugenda.

Ku banyagihugu ba Libani, hari ubwoba ko igihugu cose gishobora kwisanga cinjiye mu ntambara y’uburakari.

Ni mu gihe umutegetsi wa Palestina atangaza ko igitero ca Israel cagemye Ain al-Hilweh – ikambi y’impunzi nini gusumba izindi muri Libani.

Amatororokanirizo y’amakuru AFP na Reuters yompi asubiramwo abarongoye iyi kambi bavuga ko iki gitero gisa n’icarondera umutegetsi w’umuhari Fatah w'Abanyapalestina.

Ni co gitero ca mbere gikozwe kuri ino kambi iri hafi y’igisagara ca Sidon kiri mu bumanuko bwa Libani kuva imishamirano ku rubibe rwa Libani na Israel itanguye, haraciye hafi umwaka.

Ingaruka zikomeye ari nka hamwe Irani yotera Israel

Ibi bibaye inyuma y’aho ejo ku wa mbere umushikiranganji wa Amerika ajejwe kwivuna abansi Lloyd Austin avuganiye na mugenziwe wa Israel Yoav Gallant, aho “bumvikanye ko ari nkenerwa gusambura ibintu vyotuma haba igitero ku rubibe” mu ntumbero yo gukingira abanyagihugu ba Israel ibitero vya Hezbollah, nk’uko biri mw’itangazo ry’ubushikiranganji bwo kwivuna abansi bwa Amerika.

Hagati aho, iri tangazo rivuga kandi ko ari nkenerwa cane “kuva mu bikorwa vya gisirikare bakaja mu nzira y’ibiganiro”.

Impande zompi kandi zigabisha ko hashobora kuba “inkurikizi mbi zikomeye” kuri Irani ari nka hamwe yogerageza gukora igitero kitaziguye kuri Israel.