'Twese ntituri amabandi, kandi dufite icyo tumariye igihugu' – Umunyedini asubiza ibyavuzwe na Perezida Kagame

Umwe mu banyamadini mu Rwanda yavuze ko yatunguwe no kuba Perezida Paul Kagame yagaragaje urwego rw'amadini "nk'urudafite akamaro" mu gihugu, avuga ko "yakoresheje amagambo ateye impungenge".

Mu kiganiro n'abanyamakuru ku wa kane nimugoroba, Kagame yabajijwe ku nsengero zafunzwe kubera ibyo zitari zujuje, zikabikosora ariko zikaba zitarafungurwa.

Umwaka ushize leta y'u Rwanda yafunze inzu zo gusengeramo zirenga 10,000 kubera "kutuzuza amabwiriza arimo kwemerwa n'amategeko, imyubakire yazo, ubuziranenge, isuku n'isukura" n'ibindi, nk'uko byari biri mu itangazo ry'ikigo cy'imiyoborere cya leta.

Mu gusubiza ikibazo yabajijwe, Perezida Kagame yavuze ko iyo aba ari we "nta nsengero nafungurira n'imwe" yongeraho ko n'izo bafunguye ari uko "…tudashaka guhutaza abantu, naho [ubundi] hafunzwe nkeya".

Umunyedini wo ku rwego rwa pasitoro mu rusengero rwo mu mujyi wa Kigali wavuganye na BBC ntiyifuje gutangazwa umwirondoro ku bw'umutekano we, nk'uko abivuga.

Uyu yavuze ko hari insengero zafunzwe zitari zujuje ibisabwa kandi urwego rw'amadini rwarangwaga n'akajagari. Avuga ko hakiri ikibazo cy'insengero zari zafunzwe zitujuje ibisabwa ariko nyuma yo kubyuzuza hakaba "hashize amezi menshi zarangiwe kongera gufungura".

Yagize ati: "Ibyo Nyakubahwa Perezida yavuze ko 'ari we nta na rumwe yafungura', biteye ubwoba kuko bishobora guha umurongo abagomba gufungurira insengero zujuje ibyangombwa, ntabwo tubifata nk'ibintu byoroshye."

Ibarura rusange ry'abaturage mu Rwanda ryo mu 2022 rivuga ko 92% by'abaturage ari abakristu, basengera mu madini atandukanye ya gikristu.

Perezida Kagame asubiza umunyamakuru yabaye nk'ugaragaza ko insengero zifite umwanya muto mu buzima bw'ibihugu, aho yagize ati: "…Muri ibi byose twavugaga n'izi ntambara ziri kw'isi, no kubaho kw'igihugu, insengero zifitemo uruhare ki? Nazo ziratanga akazi se? Abenshi barabeshya gusa…Njye ibyo mbona ko ari abantu huzuyemo ububandi gusa."

Yongeraho ko "kurwana n'ababandi bari mu nsengero nabyo nta mpuhwe mbifitiye nabusa, rwose".

Umunyamadini wavuganye na BBC avuga ko aya "ari amagambo akomeye" yavuzwe n'umukuru w'igihugu "yo kwerekana amadini nk'adafite icyo amaze".

Yagize ati: "Abakora amabi ntaho batari, amabandi mu banyamadini arahari nk'uko no muri leta ashobora kuba ahari. Ariko ntabwo twese turi amabandi, nta nubwo dukwiye gufatwa gutyo.

Arakomeza ati: "Uruhare rw'amadini mu buzima bw'Abanyarwanda uyu munsi no mu kubaho kw'igihugu ntawe ngiye kurwigisha, benshi bararuzi. Ntekereza ko na Nyakubahwa Perezida ashobora kuba urwo ruhare aruzi, numvise ngize impungenge zikomeye maze kumva ibi yavuze."

Ukwemera Imana mu Rwanda, no muri Afurika muri rusange, ni ingingo itavugwaho rumwe ariko ikidashidikanywaho ni uko Afurika iri mu hantu kw'isi hari umubare munini w'abemera Imana, kandi bakora imihango itandukanye yo gusenga mu buryo buhoraho.

Ukwemera kwa gikristu kwazanywe mu Rwanda, no muri Afurika n'abazungu, bazanye n'abategetsi b'abakoloni mu myaka irenga 120 ishize.

Mu kiganiro n'abanyamakuru, Kagame yagize ati: "…ariko mwebwe abakoloni barabarindagije namwe murarindagira…mujye guhinga mworore...gusenga.. gusenga nushaka usengere kuri telephone."

Ku kuba abaturage bava aho insengero zafunzwe bakajya aho zifunguye bigatera umubyigano, Perezida Kagame yagize ati: "N'aho tuzazifunge ahubwo, yego, ubwo tuzazifunga bajye basengera mu rugo rwose, iri senga…"

Ku munyamadini wavuganye na BBC yavuze ko hari abumva Perezida n'abagomba gushyira mu ngiro umurongo wa leta "bashobora gufata ibi nk'aho insengero zitagikenewe mu Rwanda".

Yongeraho ati: "Ariko twe abemera tuzi ko kwemera Imana, no gusenga Imana bifite umwanya udakwiye gusuzugurwa mu buzima bw'igihugu."