Ku byavuzwe na Perezida Kagame, Léon Habyarimana avuga ko 'nta kibazo' abona mu kuba umuryango wabo wavugana na Tshisekedi

Umuhungu w'uwahoze ari Perezida w'u Rwanda Juvénal Habyarimana yabwiye BBC ko "nta kibazo kirimo" habaye hari uwo muryango wabo wavuganye na Perezida wa Repubulika ya Demokarasi ya Congo, nyuma yuko Perezida w'u Rwanda Paul Kagame ashinje uwo muryango kuba mu mugambi wo kugirira nabi ubutegetsi.

Mu kiganiro n'abanyamakuru ku wa kane, atamuvuze mu izina, Perezida Kagame yashinje "umwe mu bahungu ba Habyarimana" n'abantu barimo n'abahoze ari abategetsi muri leta y'u Rwanda iriho ubu, kuba mu mugambi bahuriyeho n'umutwe wa FDLR urwanya ubutegetsi bw'u Rwanda, ukorera mu burasirazuba bwa DRC.

Mu kiganiro kuri telefone na BBC News Gahuzamiryango, Léon Habyarimana – umwe mu bahungu b'uwahoze ari Perezida Habyarimana – ntiyahakanye cyangwa ngo yemeze ko hari uwo mu muryango wabo wavuganye na Perezida wa DRC Félix Tshisekedi.

Léon Habyarimana ntiyavuze ko mu bo umuryango wabo wavuganye na bo harimo na FDLR.

Yagize ati: "Tuvugana n'abantu benshi, twavugana na Perezida Tshisekedi [cyangwa] tutavugana na we, ndumva ibyo nta kibazo kirimo, nta nubwo ari ibintu umuntu yakwirirwa anatindaho."

Abajijwe kubisobanura neza, yagize ati: "Ikintu jyewe nakwemeza, ni uko abantu abo ari bo bose tuvugana ku byerekeye u Rwanda, tuvugana na bo turi gushakira ubumwe Abanyarwanda, turi gushakira amahoro Abanyarwanda bose kandi turi gushakira ubutabera Abanyarwanda bose."

Muri icyo kiganiro n'abanyamakuru, Perezida Kagame yavuze ku muryango wa Habyarimana ubwo yasubizaga ikibazo cy'umunyamakuru w'ikinyamakuru La Croix cyo mu Bufaransa.

Uwo munyamakuru yabajije Kagame icyo atekereza ku kuba dosiye iregwamo Agatha Kanziga, umupfakazi w'uwari Perezida Habyarimana, bishoboka cyane ko iteshwa agaciro mu nkiko zo mu Bufaransa, "n'isano cyangwa ijambo" uwo muryango, nkuko uwo munyamakuru wa La Croix yabivuze, ushobora kuba ugifite "kuri FDLR binyuze muri Kinshasa".

Kagame yavuze ko bifitanye isano harimo no "kugabanya isura mbi nyayo ya FDLR".

Yagize ati: "Mu gihe cya vuba aha gishize, mu myaka, mu mezi [ashize], turabizi ko umuhungu, umwe mu bahungu ba Habyarimana hamwe na bamwe mu bantu bahunze bavuye hano, hagati aho, baba i Burayi, muri Amerika, bakora muri uyu mugambi wa FDLR, ndetse bashatswe, bahabwa amafaranga, [ndetse] bakomeje gushinga ibintu binyuranye bayobowe na Perezida wa DRC, we ubwe...

"Turakurikira, tubona inzinduko, inzinduko nyinshi bagirira muri leta ya DRC i Kinshasa ndetse dukurikira ibikorwa bashobozwa kujyamo. Barimo n'abahoze ari abategetsi muri leta [y'u Rwanda] bahunze nko mu myaka 20 ishize..."

"Rero ibi bintu ushobora kubihuza. Ubona FDLR ihishirwa n'abategetsi bamwe b'i Burayi n'ahandi, nuko [ukabona] umuryango wa Habyarimana, abantu bagize uruhare mu byabaye by'amahano nk'umugore we, bari mu nkiko, dosiye igafatwa uko ibyo bihugu bikomeye bibigennye."

Ubucamanza bw'u Rwanda bushinja Agatha Kanziga ko we n'abari bakomeye mu gisirikare na politike bari bari hafi y'umuryango wa Perezida Habyarimana mu cyiswe 'Akazu', ari bo bari inyuma y'umugambi wa jenoside yabaye mu Rwanda mu 1994. Agatha Kanziga yakomeje kubihakana.

Muri Gicurasi (5) uyu mwaka, abacamanza bo mu Bufaransa bafashe umwanzuro – nyuma wajuririwe n'uruhande rumushinja – wo gushyira iherezo ku maperereza kuri Kanziga, w'imyaka 82, bavuga ko "agaragara atari nk'uwakoze jenoside, ahubwo neza nk'uwahohotewe kubera igikorwa cy'iterabwoba" cyakorewe umugabo we, ubwo indege yari arimo yahanurwaga yitegura kugwa ku kibuga mpuzamahanga cy'indege cya Kigali, mu ijoro ryo ku wa gatatu, ku itariki ya 6 Mata (4) mu 1994.

Ihanurwa ry'iyo ndege – ryahitanye abari bayirimo bose bari hafi ya Habyarimana ndetse n'uwari Perezida w'u Burundi Cyprien Ntaryamira – rifatwa henshi nk'imbarutso ya jenoside, yiciwemo Abatutsi n'Abahutu batari bashyigikiye ubwicanyi.

Mu kiganiro n'abanyamakuru, Kagame yongeyeho ati: "Ubundi ukumva abantu babaza bati 'FDLR, igizwe n'abantu bangahe?'"

"... Iyo twinubira FDLR, aba bajenosideri, mu by'ukuri si no kubinubira ukwabo bonyine. Bongererwa imbaraga, bashobozwa gukora kubera gukorana, urugero, na leta y'i Kinshasa cyangwa abategetsi bamwe b'i Burayi batuma ibi biba ubundi amaherezo bakabipfobya ku mugaragaro."

Umubano w'u Rwanda na DRC wabaye mubi, by'umwihariko kuva mu mpera y'umwaka wa 2021 ubwo intambara yongeraga kubura hagati y'ingabo za leta ya DRC (FARDC) n'umutwe w'inyeshyamba wa M23 uyirwanya.

Leta y'u Rwanda ihakana ko rwohereje ingabo ibihumbi muri DRC gufasha umutwe wa M23 nk'uko bivugwa na leta ya Kinshasa na ONU, ikavuga ko yafashe "ingamba z'ubwirinzi".

Mu gihe cyashize, Kinshasa yavuze ko nta gahunda ya leta iriho yo gukorana na FDLR ndetse iburira ko umusirikare wa FARDC uzafatwa akorana na yo azabihanirwa, isaba abagize uwo mutwe gushyira intwaro hasi.

Guhera mu kwezi gushize, FARDC yatangiye gufatanya na MONUSCO ibikorwa byo gushishikariza abo mu mutwe wa FDLR gushyira intwaro hasi no kwishyikiriza bagacyurwa mu Rwanda.

Amerika na yo ikomeje kuyobora gahunda y'amasezerano y'amahoro hagati y'u Rwanda na DRC, agamije kurangiza intambara yo mu burasirazuba bwa DRC, imaze imyaka hafi 30 ihagarara ikongera ikubura.

Léon Habyarimana avuga ko mu muryango wabo "umuntu avugana n'abantu benshi ari gushaka ukuri ku byabaye ku mubyeyi wacu kuko ni byo byateje ikibazo mu Rwanda kandi akaba ari na byo abantu bari kugenderaho kandi ari [na] cyo kintu cya ngombwa kigomba kuzana amahoro mu karere".

Yagize ati: "... n'abo muri icyo gihugu cyo muri Congo umuntu ashobora kuvugana na bo kuko hari impunzi umuntu aba aganira na bo kuko dushakira ubutabera Abanyarwanda bose...

"... Naho kuvugana na we [Tshisekedi] rwose umuntu abonye uburyo yavugana na we – ariko jye ndikuvuga ku giti cyanjye – umuntu abonye uburyo yavugana na we, hari igisubizo yatanga, umuntu yavugana na we ndumva nta kibazo kirimo."