Uwashinze urubuga rwa Telegram avuga ko umutungo we azawuraga abana barenga 100 yabyaye

Umuherwe Pavel Durov washinze urubuga nkoranyambaga rwa Telegram avuga ko abana barenga 100 yabyaye bazasaranganya umutungo we ugereranywa ko ugera muri miliyari 13.9 z'amadolari y'Amerika.

Durov yabwiye ikinyamakuru Le Point cyo mu Bufaransa ati: "Bose ni abana banjye kandi bazagira uburenganzira bungana! Sinshaka ko bazasubiranamo nimara gupfa."

Durov yavuze ko ari "papa mu buryo bwemewe n'amategeko" w'abana batandatu yabyaranye n'abakunzi batatu banyuranye, ariko ko ivuriro "aho natangiriye gutanga intanga ngabo mu myaka cumi n'itanu ishize mu gufasha inshuti, ryambwiye ko abana barenga 100 basamwe muri ubu buryo mu bihugu 12 bitandukanye".

Yanongeye kuvuga ko nta cyaha yakoze, bijyanye n'ibirego bikomeye akurikiranyweho mu Bufaransa.

Uyu muherwe w'Umurusiya wo mu rwego rw'ikoranabuhanga wahunze ku bushake bwe, yanabwiye icyo kinyamakuru ko abana be bazagera kuri uwo murage we ari uko hashize imyaka 30.

Yagize ati: "Ndashaka ko babaho nk'abantu basanzwe, bakiyubaka ubwabo, bakiga kwigirira icyizere, bagashobora kugira ibyo bahanga [bakora], ntibarambirize kuri konti yo muri banki."

BBC yagerageje kuvuga na Durov kugira ngo agire ibindi abivugaho ariko ntibyashobotse kugeza ubu.

Durov, w'imyaka 40, yavuze ko yanditse umurage we kuko akazi ke "karimo ibyago – kurengera ubwisanzure bituma ugira abanzi benshi, barimo n'abo mu bihugu bikomeye".

Urubuga rwe rwa Telegram, ruzwiho kwibanda ku kubungabunga umutekano w'amakuru no kugira uburyo burinda amakuru cyane mu kohererezanya ubutumwa ('encrypted messaging'), buri kwezi rukoreshwa n'abantu barenga miliyari imwe.

Durov yanavuze ku birego akurikiranyweho mu Bufaransa, aho yafatiwe mu mwaka ushize nyuma yo gushinjwa kunanirwa kugenzura (gukorera ubugororangingo) ibitekerezo bitangazwa ku rubuga rwe kugira ngo rugabanyweho ubugizi bwa nabi.

Yahakanye ko yananiwe gukorana (gufatanya) n'inzego zishinzwe kugenzura iyubahirizwa ry'amategeko ku bijyanye n'ubucuruzi bwa magendu bw'ibiyobyabwenge, amakuru ajyanye no gusambanya abana n'uburiganya.

Mbere, urubuga rwa Telegram rwahakanye ibyo rushinjwa byo kutagira uburyo buhagije bwo kugenzura ibirutangazwaho.

Muri icyo kiganiro n'ikinyamakuru Le Point, yavuze ko ibyo birego "ntibifite ishingiro na busa".

Yongeyeho ati: "Kubera ko gusa abagizi ba nabi bakoresha serivise yacu yo kohererezanya ubutumwa mu zindi serivise nyinshi [dufite], ntibituma abashinzwe uru rubuga baba abagizi ba nabi."

Durov, wavukiye mu Burusiya, ubu aba i Dubai muri Emira Zunze Ubumwe z'Abarabu (UAE), aho Telegram ifite icyicaro. Afite ubwenegihugu bubiri, ubw'Ubufaransa n'ubwa UAE.

Mu mwaka wa 2014, uyu washize urubuga nkoranyambaga rwa VKontakte rwo mu Burusiya yavuze ko yirukanwe ku kazi nyuma yo kwanga kuniga (kuburizamo) ubutumwa bwo kuri urwo rubuga nkuko ibiro bya perezida w'Uburusiya (Kremlin) byari byabimusabye.

Yashinze Telegram mu mwaka wa 2013, ndetse uru rubuga ruracyakoreshwa cyane mu Burusiya.