Umunyororo w'ubuzima bwose ku mugore wo muri Nouvelle-Zélande yishe abana biwe akababika mu masakoshi

Umugore wo muri Nouvelle-Zélande yishe abana biwe babiri abakanyegeza mu masakoshi yaciriwe umunyororo w'ubuzima bwiwe bwose.

Hakyung Lee yagiriwe n'icaha muri Nyakanga (9) co kwica Yuna Jo yari afise imyaka umunani hamwe na Minu Jo yari afise imyaka itandatu, ategerezwa kumara nibura imyaka 17 ari mw'ibohero imbere y'uko ashobora gusaba kurekurwa vy'agateganyo.

Lee w'imyaka 45, avuga ko atari akomeye neza mu mutwe igihe yica aba bana biwe mu 2018, inyuma y'igihe gito umugabo wiwe apfuye.

Umucamanza wo muri sentare nkuru y'igihugu Geoffrey Venning yavuze ko amagara yiwe yo mu mutwe yagize uruhara, ariko ko ivyo yakoze vyari vyateguwe.

Ibisigarira vy'aba bana vyagiye gutorwa mu 2022 n'umuryango wari watsindiye icamunara y'ibintu vyari mu nyubakwa y'ububiko yari yarahebwe ahitwa Auckland.

Mu rubanza rwamaze indwi zibiri zirenga, ababuranira Hakyung Lee babwiye sentare ko ubuzima bwiwe bwo mu mutwe bwagiye kuba nabi cane inyuma y'urupfu rwa Jo, ivyatumye abona ko vyari kuba vyiza abasigaye mu muryango bapfiriye rimwe.

Lee yaragerageje kwiyica no kwica abana biwe mu kubaha ibinini vyo kugabanya agahinda bizwi nka nortriptyline abivanze n'umutobe, mugabo asanga yihenze ku rugero hanyuma aza kwikangura asanga abana biwe bapfuye, nk'uko abamuburanira bavuga.

Abashikirizamanza bavuga ko igikorwa ca Lee ari ico "kwikunda kugira ngo yikureko umuzigo wo kurera abana ari umwe ".

Inyuma y'ubu bwicanyi, Lee yaciye ahindura izina aca ava muri Nouvelle-Zélande. Yahagaritswe ari muri Korea y'Epfo (igihugu yavukiyemwo) muri Nyakanga (9) 2022, aca asubizwa muri Nouvelle-Zélande muri uwo mwaka nyene.

Mu rubanza rwo kuri uno wa gatatu, sentare yabwiwe ko ubu bwicanyi bwababaje umuryango wa Lee n'iw'umugabo wiwe Ian Jo.

Mw'ijambo ryarimwo ibigumbagumba ryasomwe n'abashikirizamanza, nyina wa Lee Choon Ja Lee yavuze ko ababajwe no kubona atashikanye umukobwa wiwe ku muhanuzi, avuga ko Lee atari "agishaka kubandanya abaho" igihe Jo yahitanwa na kanseri muri Munyonyo (11) 2017.

"Nimba yashaka gupfa, kubera iki atapfuye wenyene? Kubera iki yahitanye ubuzima bw'abana b'inzirakarengane?" Ni ko Choon Ja Lee yanditse, nk'uko bivugwa n'ibinyamakuru vya Nouvelle-Zélande.

Mwenewabo na Jo, Jimmy yavuze ko atigeze yibaza "ko akabi nk'aka gateye ubwoba kari gushobora kuba mu muryango wacu".

Nyina wiwe ubwiwe – inakuru wa Yuna na Minu – gushika ubu ntazi nimba koko barapfuye, nk'uko abivuga.

Jimmy ati: "Umuhisi mwenewacu yari yipfuje ko nari kubandanya ndabakingira. Iki ni igihano kidashobora na gato gutezurwa".

Nk'uko isuzuma ry'ubuzima bwo mu mutwe ryakozwe imbere y'uko urubanza rusomwa rivyerekana, Lee ashobora kuba yari arwaye 'agahinda kadasanzwe' hamwe n'umubabaro w'igihe kirekire igihe ubu bwicanyi bwaba, nk'uko iradiyo RNZ yo muri ico gihugu yabitangaje.

Umucamanza Venning yategetse ko Lee afatwa nk' "umurwayi adasanzwe" mu gihe azoba apfunzwe, kubera ubuzima bwiwe bwo mu mutwe.

Ati: "Ntiwashoboye kwihangana igihe [umugabo wawe] yari aremvye, kandi birashoboka ko utashoboye kwihanganira abana bari kumwe nawe kuko baguma bakwibutsa ubuzima bwawe bw'umunezero wahavuye utakaza nabi cane".