Perezida ushinjwa gusenya umwuka w'ituze wa Tanzania

Tanzania iracyari mu mwuka w'urugomo rwa mbere rubi cyane rwayibayemo nyuma y'amatora mu myaka ibarirwa muri za mirongo yari ishize, ayo makuba akaba yarashegeshe izina yari yarubatse ryari rimaze igihe kirekire ryo kuba igicumbi cy'amahoro n'umutekano muri Afurika.

Mu buryo bw'imbonekarimwe, ibyo byanatumye iki gihugu gicyahwa (kinengwa) n'umuryango kirimo wo mu karere wa SADC ndetse n'umuryango w'Ubumwe bw'Afurika (AU).

Mu ijambo ryo kurahira ririmo kwinangira, yavuze ku wa mbere ushize, Perezida Samia Suluhu Hassan yavuze ko amatora yabaye mu buryo butabogamye kandi mu mucyo ariko yemera ko abantu bapfiriye mu myigaragambyo. Iyo myigaragambyo yiciwemo abantu, yayegetse ku banyamahanga.

Umubare w'abapfuye nturamenyekana neza ariko imiryango ikomeje gushakisha cyangwa gushyingura benewabo bishwe nyuma y'ayo matora aherutse yateje impaka, Samia yatsinze n'amajwi 98%.

Samia, umutegetsi uvuga yoroheje ndetse urangwa n'imyifatire irimo ituze no gucisha macye, mu ntangiriro ibyo byatumye bamwe bagira icyizere ubwo yajyaga ku butegetsi mu 2021 nyuma y'urupfu rutunguranye rw'uwo yasimbuye w'umunyagitugu wari uri ku butegetsi, John Magufuli.

Ariko ubu ibyo byarahindutse.

Profeseri Peter Kagwanja, umusesenguzi ku igenamigambi wo muri Kenya, yabwiye BBC ati: "Samia yasunikiye Tanzania mu myigaragambyo, umutekano mucye n'urujijo."

Iyo myigaragambyo, yateguwe n'urubyiruko, ifitanye isano igaragara n'uburyo bwo gukusanya imbaga bw'ahandi ku isi buyoborwa n'urubyiruko rw'abazwi nk'aba Gen Z, bwo kwamagana ubutegetsi bwashinze imizi ndetse butagira icyo bukora ku byo rusaba.

Abasesenguzi bavuga ko nubwo izo mvururu zitari zarigeze zibaho mbere muri Tanzania, zabanjirijwe n'umwuka wa politike w'ubushyamirane - waranzwe n'ihagarara ry'amavugurura, uburakari bw'urubyiruko bwari bumaze imyaka bututumba, guhatanira ubutegetsi imbere mu ishyaka riri ku butegetsi rya Chama Cha Mapinduzi (CCM), ndetse n'itoteza rimaze igihe kirekire rikorerwa abakuru b'abatavuga rumwe n'ubutegetsi.

Godfrey Mwampembwa, Umunya-Tanzania uba i Nairobi muri Kenya utangaza inkuru zishushanyije zo kuninura (kunenga) muri politike, uzwi cyane ku izina rya Gado, yagize ati: "Imyigaragambyo yabaye iherezo ry'imyaka yari ishize Abanya-Tanzania bafite uburakari n'inzika bapfukiranye."

Inkuru zishushanyije za Gado zininura Perezida Samia nk'umutegetsi w'umunyagitugu ndetse utihanganira irushanwa (ihatana) muri politike, zarahererekanyijwe cyane ku mbuga nkoranyambaga.

Jenerali Ulimwengu, umunyamakuru w'Umunya-Tanzania ubimazemo igihe kirekire, yatangaje inkuru y'ibitekerezo bye bwite avuga ko amatora aherutse kuba muri Tanzania ari "ibira [kubira] ry'amasosi yo muri sosiyete [ya Tanzania] yari amaze imyaka za mirongo atetswe ku iziko rya rondereza atabonwa n'ubutegetsi burangaye, bwarengewe burundu muri gariyamoshi yuzuyemo isosi y'inyama".

Ibitekerezo nk'ibyo byanatangajwe na Gado, washinje ishyaka riri ku butegetsi rya CCM "gushyingura [guhisha] umutwe waryo mu musenyi" no "kutumva" amajwi akomeje kwiyongera y'Abanya-Tanzania basaba impinduka.

Uwo mwanditsi w'inkuru zishushanyije zo kuninura, ukurikiranira hafi ibibera iwabo ari muri Kenya, yagize ati: "CCM imaze imyaka yarambuye uburenganzira abaturage ndetse yarirengagije inzego za leta zagakwiye kuyibaza inshingano [mu byo ikora]."

Charles Onyango-Obbo, utangaza ibitekerezo binyuranye kuri Afurika y'uburasirazuba, yemera ko CCM "imaze igihe kirekire yaritiranyije ituze no gukura [muri politike], ariko ni imyaka gusa n'ubwibone byari byihishe inyuma y'amateka y'icyubahiro".

Yanditse ati: "[CCM] Yitiranyije guceceka kw'abaturage igira ngo ni amahoro, ntiyabona ko ryari ituze ritewe no kurambirwa cyane."

Bitandukanye n'andi mashyaka yo mu karere, CCM, yavutse iturutse mu ishyaka rya TANU (Tanganyika African National Union) ryagejeje Tanzania ku bwigenge, yo ni ishyaka ryo kwibohora kwa nyuma y'ubukoloni ryagumanye igenzura rikomeye ku nzego z'ubutegetsi no ku mitekerereze y'igihugu.

Ariko imiterere y'aya matora aherutse ni yo yashyize ku karubanda uruhande rushya ruteye ubwoba rwa Tanzania, igihugu cyari kimaze igihe kirekire kibonwa nk'igitinya imyigaragambyo, cyane cyane ukigereranyije na Kenya bituranye.

Abasesenguzi bavuga ko mu mezi yabanjiriye umunsi w'amatora, leta iyobowe na CCM yakoze mu buryo buri kuri gahunda mu kwigizayo umuntu uwo ari we wese wajyaga guhatana na yo.

Abakuru b'amashyaka abiri ya mbere akomeye atavuga rumwe n'ubutegetsi babujijwe kwiyamamaza - Tundu Lissu, w'ishyaka rya CHADEMA, arafunze aregwa ibyaha by'ubugambanyi, ibirego ahakana, mu gihe kandidatire ya Luhaga Mpina, w'ishyaka rya ACT Wazalendo, yanzwe ku mpamvu za tekinike (zijyanye n'imikorere).

Profeseri Kagwanja avuga ko icyo gikorwa ubwacyo cyonyine kinyuranyije n'ibyo Tanzania, na Perezida wayishinze Julius Nyerere, baharaniye.

Profeseri Kagwanja yagize ati: "Ntabwo ufunga abo mutavuga rumwe, ushaka gushyigikirwa n'abaturage mu guhangana n'abatavuga rumwe nawe."

Uyu Perezida abakunzi be bita Mama Samia, w'imyaka 65, ubu yugarijwe n'abamushinja gutegeka leta y'ikandamiza yasyonyoranye urugomo imyigaragambyo yanditse amateka muri icyo gihugu.

Umuvuno we w'ubutegetsi mbere washimwe muri Tanzania no mu mahanga, ubwo yemereraga amashyaka atavuga rumwe n'ubutegetsi gukora za mitingi (inama) no kunenga leta nta bwoba bwuko byayagiraho ingaruka zikomeye.

Yari yarasezeranyije kongera gufungura Tanzania ikagendwa n'amahanga, abinyujije mu ntero ye yise "4R", ni ukuvuga "R enye", nk'inyuguti zibanziriza amagambo ane y'Icyongereza ari yo ubwiyunge (reconciliation), kwihangana (resilience), kongera kubaka (rebuilding) n'amavugurura (reform).

Samia, wavukiye akanakurira muri Zanzibar, ibirwa bifite ubwigenge bucagase bizwiho kwicisha bugufi no kugira urugwiro, ntibyatangaje kuba hari abagize ukwihurutsa muri bo ubwo yageraga ku butegetsi mu mwaka wa 2021.

Ariko abasesenguzi bavuga ko ubwo Samia yahangaga amaso manda ya kabiri, yatangiye kubona igitutu imbere muri CCM no kongera kwaduka kw'abatavuga rumwe na we, nk'inkeke ku cyifuzo cye.

Mu myaka itatu ishize, yasheshe guverinoma inshuro nyinshi ndetse asimbuza umugaba w'ingabo n'umukuru w'ubutasi, ibikorwa byagaragaye nko kurandura inkoramutima z'uwo yasimbuye.

Profeseri Kagwanja yagize ati: "Muri CCM, yiyambaje umuvuno wa Magufuli wo gukoresha ishyaka, kwishingiraho ubutegetsi no gushyiraho agatsiko k'inkoramutima z'abizerwa [be], nk'izingiro rishya ry'ubutegetsi."

Amayeri ya politike ya Samia arimo imibare - yatumye abamushyigikiye bamuhimba izina rya "Simba jike" (mu Giswayile bivuze intare y'ingore) - yaramuhiriye ubwo CCM yamugenaga muri Mutarama (1) uyu mwaka nk'umukandida perezida wayo.

Ubwo haburaga amezi ngo amatora abe, urukurikirane rw'ibikorwa by'ubushimusi, gutabwa muri yombi hamwe n'ubwicanyi bwakorewe abatavuga rumwe n'ubutegetsi, byibasiye iki gihugu, bisenya icyizere cyuko hazaba amavugurura n'ubwiyunge.

Urubuga rwa politike rwari rwaragabanutse cyane mu gihe amatora aherutse yari yegereje, yabayemo ifungwa ry'umurongo wa interineti hamwe no gushyiraho igihe ntarengwa abaturage bagombaga kuba bageze mu ngo zabo.

Abatavuga rumwe n'ubutegetsi bavuga ko abantu babarirwa mu magana bashobora kuba barapfuye mu mvururu zakurikiye amatora. Abategetsi ntibaratangaza umubare w'abapfuye.

Urwo rugomo rwari ruteye ubwoba ku gihugu cyari cyarubatse izina ryo kurangwa n'ituze, ubwumvikane, no gushyira ibintu ku murongo, mu gihe cy'imyaka hafi 60.

Onyango-Obbo yagize ati: "Ibivugwa by'ubudasa bwa Tanzania byasenyutse."

Mu kunenga kudasanzwe kuyiranga, imiryango ya AU na SADC yavuze ko intsinzi ya Samia mu matora itubahirije ibipimo bya demokarasi, ivuga ko habayeho gushyira amajwi y'amahimbano mu dusanduku tw'itora, ikandamiza hamwe n'inenge zimbitse (ziri henshi).

Ishyaka rya CHADEMA, rya mbere rikomeye ritavuga rumwe n'ubutegetsi muri Tanzania, ryapfobeje ibyavuye mu matora, rivuga ko ari "ibihimbano byuzuye".

Profeseri Kagwanja yagize ati: "Ingorane kuri Samia ntiyari iyo gutsinda amatora. Ahubwo, yari iyo kwigarurira imitima n'ibitekerezo by'Abanya-Tanzania n'abaturage b'Afurika y'uburasirazuba akabemeza ko yatowe mu matora anyuze mu mucyo. Mu buryo bubabaje, Samia yahisemo iyimikwa. Yafunze inzira zose zo gutuma habaho ihatana rinyuze mu mucyo."

Mu gihe atangiye manda ye ya kabiri, abasesenguzi bavuga ko Samia azahangwa amaso cyane n'amahanga, bikaba bishobora kubangamira kugira ijambo ryo gutegeka Tanzania.