Be sydd orau gennych chi - canu ta actio? (Catrin o'r Groeslon)
Canu, ar hyn o bryd, a bach o gynhyrchu hefyd. Dwi'n mwynhau yn arw.

Er hynny, byswn yn hoffi mynd 'nol i'r hen Les yn Talcen Caled os byswn yn cael y cyfle; roedd yna ddigon o scôp i wneud fwy efo fo.

Sut ydych yn mynd ati i sgwennu caneuon? (Nerys o Aberystwyth)
Mae'n amrywio - weithiau mae syniad yn dod i mi gyda'r nos ac mae'n rhaid codi i'w sgwennu i lawr, neu stopio'r car i nodi syniad am gân. Weithiau dwi'n codi yn y bore ac yn penderfynu, 'heddiw rhaid sgwennu cân', yn enwedig os yw dyddiad sesiwn yn y stiwdio yn nesau.

Fi sy'n sgwennu'r geiriau fel arfer ac wedyn yn ffarmio'r geiriau allan i bwy bynnag sy'n siwtio. Neu yn ddiweddar mae Rhys Parry wedi bod yn sgwennu'r gerddoriaeth yn gyntaf a dwi wedi bod yn sgwennu'r geiriau i gyd-fynd efo'r alaw.

Mi wnes i sgwennu sawl gân allan ym Mhatagonia pan es i allan i ffilmio, felly mae albwm Toca efo rhyw naws De Americanaidd. Roedd Patagonia yn arbennig a dwi'n hel fy arian i fynd yn ôl yna! Maen nhw'n siarad gwell Gymraeg na lot o Gymry gan nad ydynt yn siarad dim Saesneg.

Ym mhle yn y byd hoffech gynnal gig? (Nia o Gasnewydd)
Mi wnes i gymryd rhan mewn rhaglen teledu ar lwyfan y Grand Ole Opry yn Nashville unwaith - roedd yn brofiad gwych. Ond hoffwn fynd yn ôl i berfformio yng nghastell Caernarfon. Dwi'n hoffi'r syniad o'r Cymry yn cymryd drosodd y castell ac yn ei hawlio yn ôl i ni ein hunain. Roedd yr awyrgylch yn braf yna.

Pa fath o bethau mae eich ffans wedi lluchio ar y llwyfan? (Fran o'r Wyddgrug)
Pob math o bethau! Llyfrau, barddoniaeth, nicyrs, bra, bwyd a diod!

Rwyt ti'n llwyddo i apelio at bobl o bob oedran, beth yw dy gyfrinach? (Catrin o Landeilo)
S'gen i ddim syniad! Os fyswn yn gwybod byswn yn ddyn cyfoethog iawn. 'Da ni'n gwneud stwff i blesio ein hunain a digwydd bod yn plesio lot o bobl eraill hefyd.

Os cewch y cyfle i ganu deuawd gydag unrhyw ganwr, pwy fysech yn ei dewis? (Luned o Bontarddulais)
Dwi'n ffan fawr o Leonard Cohen, ac mae o wedi gwneud sawl peth efo Jennifer Warnes, felly hi. O'r sin Gymraeg, mae yna nifer o bobl - Meinir Gwilym, Heather Jones, Gwyneth Glyn, Sioned Mair - mae yna lwyth o ferched ffantastig efo lleisiau gwych ar hyn o bryd.

Be di'r atgof cynta' sy gennych o'ch plentyndod? (Elin o Bwllheli)
Mae gen i gof difrifol! Mae'n debyg mai un atgof oedd yn nhŷ fy nain yn y Groeslon, sef hen gartref mam. Roeddwn yn helpu fy wncl efo gwaith tir efo'r ceffylau - dim tractor adeg yna - ac yn deall am y tro gyntaf fy mod wedi newid o'r pentref i'r fferm.

Beth oedd y record gyntaf i chi ei brynu? (Catherine o Abertawe)
Y sengl gyntaf oedd Brawd Hwdini gan Meic Stevens.