Mae 'taflenni stori' arbennig yn cael eu dosbarthu o gwmpas y dref fel y gall unrhyw un sydd â stori i'w hadrodd gael cyfle i wneud hynny.

Mae taflenni stori ar gael o Archifdy'r Sir, Caffi Marchnad Glan yr Afon, Oriel Gelf Andrew Bailey, Canolfan Siopa Glan yr Afon, Llyfrgell Hwlffordd, Swyddfa Cyngor Tref Hwlffordd, Cymdeithas Gwasanaethau Gwirfoddol Sir Benfro ac ar-lein - cliciwch yma i lawr lwytho y daflen stori (Dogfen 'Word')

Gall pobl rannu eu straeon hefyd drwy ffonio tîm Yma i Chi ar 08703 500 700. "Mae'n bwysig i ni adlewyrchu'r hyn sy'n haeddu sylw yn Hwlffordd fel rhan o Yma i Chi a phwy well i adrodd wrthym am y dref ond y bobl sy'n byw yno?" esbonia Cydlynydd Strategaeth Gymunedol BBC Cymru Alison Quinn. "Ni allwn addo rhoi sylw i bob stori a anfonir ond fe hoffwn wybod am bopeth sy'n digwydd, gyda phwy y dylem fod yn siarad, pa faterion sy'n bwysig, yn ogystal â'r hyn sydd wedi digwydd yn hanesyddol i siapio'r dref a'i phobl."

Er mwyn ysbrydoli pobl leol i rannu eu straeon, mae BBC Radio Wales yn darlledu Diwrnod Archif Hwlffordd ddydd Mawrth, Mehefin 27. Mae'r diwrnod yn cynnwys straeon, lleisiau a safbwyntiau a recordiwyd dros y blynyddoedd gan y BBC yn Hwlffordd, gydag eitemau yn cael eu darlledu ar amrywiol raglenni drwy'r diwrnod.

Bydd Bws rhyngweithiol BBC Cymru hefyd yn y dref ddydd Mercher, Mehefin 28. Wedi ei leoli ynghanol y dref o 9am tan 3pm, anodd fydd methu'r bws melyn.

O 9 y bore gall ymwelwyr gael y cyfle i alw mewn am sgwrs gyda Kath o raglen foreol Roy Noble fydd yn fyw ar yr awyr. Bydd hi hefyd yn gwahodd pobl i geisio'i lwc gyda chystadleuaeth Llais Cudd y rhaglen.

Mae'r Bws, sydd yn llawn o'r dechnoleg ddiweddara, hefyd yn cynnig cyfle i gyfrannu i wefannau lleol BBC Cymru a darganfod mwy am raglenni a phrosiectau'r BBC.

Am fwy o wybodaeth cysyllter â Kate Stokes-Davies ar 029 2032 3781