|
Faint ohonoch chi sy'n ymwybodol o gerddoriaeth Gymraeg? Yn anffodus, mae mwyafrif pobl Llambed a gweddill Cymru mewn gwirionedd, yn tueddu i wrando ar gerddoriaeth Saesneg. Mae hyn yn warthus yn fy marn i a gall arwain tuag at ddiflaniad yr iaith!  Sut y gallwn gadw'r iaith i fynd, pan fod pobl yn troi i wrando ar Madonna pan mae gan Gymru Meinir Gwilym?
Ydych chi'n ymwybodol o'r cantorion a'r bandiau canlynol? Elin Fflur, Radio Luxembourg, Newshan, Frisbee, Java, Coda, Poppies - 'mond i enwi rhai o enwogion cerddoriaeth Cymru. Os nad oes gennych syniad pwy ydyn nhw, yna ewch allan ac archebwch eu cryno ddisgiau, yn fy marn i byddwch chi'n siŵr o'u mwynhau. Gallwn ddadlau nad oes yna ddigon o hysbysebu yn cael ei wneud i godi ymwybyddiaeth o gerddoriaeth Gymraeg. Ar sianelu teledu BBC1, BBC2 ac ITV mae yna lwyth o hysbysebion am grynoddisgiau, does dim llawer o sôn am gerddoriaeth Cymraeg ar hysbysebion S4C! Faint o glybiau Cymraeg sydd yn Llambed? DIM UN!! Dwi methu credu'r peth ond yn waeth na hynny, does dim cerddoriaeth Gymraeg yn cael ei chwarae yn nhafarndai Llambed chwaith. Mae rhaid 'neud rhywbeth cyn i'r iaith farw. Ydych chi'n cofio'r grŵp 'Maffia Mr Huws'? Wel credwch neu beidio roedd ganddyn nhw gig yng nghlwb rygbi Llambed ychydig amser yn ôl, ac mae'n flin gen i ddweud wrthych mai dim ond 28 a aeth i weld y band a oedd arfer bod yn enwog iawn. Ydych chi'n cytuno nad oes digon o gigs i'w cael o amgylch ardal Llambed? Beth am yng ngweddill Cymru? Mae gan y dre hon ddigon o gyfleusterau i gynnal amryw o gigiau, ond yn anffodus, hyd y gwela i, does gan neb y diddordeb i gynnal dim byd. Rhaid i bethau ddechrau newid!! Mae yna ddigon o dalent yng Nghymru, ac mae'n werth gwarando ar gerddoriaeth Gymraeg, felly tro nesa y byddwch chi'n troi eich radio ymlaen, tiwniwch fewn i BBC%20Radio%20Cymru am damaid o adloniant Cymraeg! Erthygl gan Alice James
"Fy Hoff CD's Cymraeg" - Lowri Davies
 |
