Y sgwrs yn gyflawn rhwng Dyfrig Jones, Fflur Dafydd a Gaynor Davies, Mawrth 26, 2007.

Colli teulu
"Mae'n anodd iawn crynhoi y stori - mae'n nofel ddyrys yn llawn o gymeriadau sy'n byw bywydau sy'n rhyw gydblethu ond eto yn eithaf ar wahân.

"Ond yn y bôn stori am ddyn yn colli'r rhan fwyaf o'i deulu ydi hi.

"Mae ei berthynas a'i wraig yn un eithaf anodd ac mae hi yn mynd â dau o'u plant i'r ysgol un bore gan ei adael o yn y tŷ efo mab anabl ac mae hi'n crasio'r car a'r tri yn cael eu lladd ac [yntau'n] cael ei adael . . . i ymdopi efo bywyd ac edrych ar ôl yr hogyn mewn cadair olwyn.

"Ac yng nghanol hyn i gyd mae o'n ffendio pentwr o lythyrau sy'n datgelu fod ei wraig wedi bod yn cael affêr [a hyn yn ei arwain i geisio] dod i adnabod ei wraig.

"Mae'n mynd i gyfarfod rhai o gymeriadau yr ardal ac yn trio cael dealltwriaeth well o pwy oedd hi," meddai.

Ond ychwanegodd nad yw'n stori sy'n cael ei dweud yn syml ac yn uniongyrchol:
Gwneud pethau'n anodd
"Mae rhywun sydd wedi bod yn gweld un o ddramâu Aled Jones Williams yn gwybod nad ydi o byth yn gwneud dim byd yn hawdd - mae o'n lecio tywyllwch a chymhlethdod ac mae yna ddigonedd o'r ddau beth yma," meddai.

Mae'r nofel, meddai, yn dilyn llwybr "digon igam ogam".

Serch hynny, dywedodd iddo ei mwynhau.

"Dydi o ddim yn llyfr perffaith ond mae Aled yn medru sgwennu ac mae unrhyw un sydd wedi gweld ei ddramâu yn gwybod ei fod yn un sy'n medru saernïo stori . . .

"Ac ar adegau mae cyfrwng y nofel yn ei siwtio yn dda iawn gan ei bod yn rhoi lot mwy o le i fynd i mewn i ymennydd cymeriad.

"Ond ar adegau eraill roeddwn i'n teimlo ei fod yn sgwennu gormod yn arddull ei ddramâu - er enghraifft, mae ganddo'r peth yma y mae o'n wastad yn ei wneud yn ei ddramâu lle mae atgofion digon dinod o orffennol yn cael eu hailadrodd ac yn adeiladu ac adeiladu.

"Ac wrth iddo adeiladu y manion yma at ei gilydd mae'n dod yn amlwg fod un o'r manion ag arwyddocâd.

"Mae hyn yn rhywbeth y mae'n hawdd i actor ei wneud gan fod actor yn rhoi y pwyslais ar y mân beth sy'n bwysig ond mae'n medru bod yn beth anodd i'w ddarllen pan fo'r llith yma o fân atgofion yn dod ar ben ei gilydd ac angen i chi ddewis pan un sy'n arwyddocaol.

"Ond ar y cyfan dwi'n credu ei fod wedi addasu ei arddull yn dda iawn i'r nofel."

Nid i'r gwangalon
Dywedodd Fflur Dafydd, hithau, nad yw hon yn nofel "ar gyfer y gwangalon" a bod yn rhaid ymroi i'w darllen.

"Mae'n nofel ddyrys ac yn nofel gymhleth, athronyddol, ac mae yna lot fawr o syniadau ac mae'r gyfeiriadaeth yn eang iawn," meddai.

Ond ychwanegodd y gall darllenwyr fwynhau mynd dan groen y nofel hon.

"Mae'r iaith yn goeth iawn - mae'n dirgrynu ar y dudalen," meddai.

"Ac fe wnes i fwynhau y gyfeiriadaeth hefyd. Ar ddechrau'r nofel mae'n sôn am Three Colours Blue ac roeddwn i'n meddwl fod hwnna'n eithaf clyfar y ffordd mae'n clymu'r stori yna gyda'r hyn sy'n digwydd i'w wraig a'i blant," meddai.

Ond ychwanegodd y gall y gyfeiriadaeth fynd yn llafurus ar adegau.

Dychanu'r Gymru newydd
Cyfeiriodd Dyfrig Jones hefyd at elfennau dychanol a hoffodd yn y nofel - a hwnnw'n ddychan o'r hyn a alwodd yn "Gymru newydd".

"Ac mae lot o'r cymeriadau yn gwneud rhyw bethau trendi, cyfryngol, artistig,," meddai gan ddisgrifio'r nofel fel caricatur o Gymru rhyw bum mlynedd yn y dyfodol.

"Ac mae o'n gwneud hynny yn arbennig o dda,".meddai.

"Yr oedd yr elfen yna o ddychanu y Gymru ddosbarth canol gelfyddydol hunan bwysig yn eithaf da," meddai.

Wrth grynhoi disgrifiodd y nofel fel:
"Llyfr anwastad ac anodd ond efo rhinweddau pendant".

A chymeradwyodd Fflur Dafydd fynd yn ôl i ddarllen rhai darnau gan nad ydych "yn cael popeth ar y darlleniad cyntaf".