|  |
 |
 |
 |
|
|
|
|
 Elwyn Roberts - marw prifardd seicig
Yr oedd y Prifardd Elwyn Roberts yn ŵr o ddiddordebau eang ac anghyffredin.
Yn wyddonydd wrth ei alwedigaeth yr oedd hefyd yn fardd ac yn ymddiddori mewn ymchwil seicig o bob math.
Yn wyddonydd ifanc dyfeisiodd offer i fesur dirgryniadau ffrwydrad niwclear unrhyw le yn y byd. Dyfeisiodd a bu'n adeiladau organau electronig hefyd.
Yr oedd yn 72 pan fu farw ar Fehefin 9 a hynny yn ei bentref genedigol ym Mhen Llŷn er mai yn Rhydtalog ger Yr Wyddgrug yr oedd yn byw erbyn hyn.
Rai blynyddoedd yn ôl prynodd hen gapel ei febyd yn Llangian ger Pwllheli i'w droi'n dŷ gan wneud llawer iawn o'r gwaith ei hun.
Yr oedd yn un a'i wreiddiau yn ddwfn yn naear Llŷn a dylanwad ei fagwraeth draddodiadol Gymreig yn fawr iawn arno.
Er dywedodd mai ymhen blynyddoedd wedyn y daeth i wir werthfawrogi'r fagwraeth honno.
Ei gysylltiad â Phen Llŷn oedd hanfod dilyniant o gerddi, Pridd, a enillodd iddo Goron Eisteddfod Genedlaethol Bro Dwyfor yn 1975.
Cyhoeddwyd y cerddi hynny a rhai eraill o'i eiddo mewn cyfrol a gyhoeddwyd toc wedyn.
Yn ystod y cyfnod hwn yr oedd yn wyddonydd gyda'r Bwrdd Trydan Canolog yn Capenhurst ger Caer yn ymchwilio i effeithiau mellt.
Ond daeth i amlygrwydd hefyd oherwydd ei ddiddordeb yn y paranormal neu'r seicig a bu'n ymchwilio'n helaeth i achosion o ysbrydion, i ysbrydegaeth ac i ffenomenau fel hupnoteiddio a iachau. Yr oedd ganddo ddoniau seicig ei hun ac yn dilyn astudiaeth mewn seicoleg a seicotherapi daeth yn gymrawd cymdeithas genedlaethol o arbenigwyr yn y maes hwnnw ac yn seicotherapydd.
Ymddiddorai hefyd mewn meddygaeth amgen a chymrodd batent ar ddull o ddefnyddio perocsid fel meddyginiaeth.
Yn ystod ei ymchwiliadau seicig ymwelodd a sawl lle a aflonyddwyd gan ysbrydion gan dynnu i'r amlwg ar adegau wybodaeth a fyddai'n peri cryn ryfeddod. Bu cyfres deledu yn amlygu'r doniau hyn.
Pwysleisiai mai diddordeb y gwyddonydd oedd ei un ef yn hytrach na rhyw ymhél mympwyol ac yr oedd y gred yng ngoroesiad ein bodolaeth yn greiddiol i'w syniad o fywyd a lle dyn yn y bydysawd.
Yr oedd yn fardd cywrain a thelynegol er, weithiau, oherwydd y gyfeiriadaeth, yn peri trafferth o ran dehongliad.
Wrth ei wobrwyo ym Mro Dwyfor dywedodd un o'r beirniaid, Haydn Lewis, ei fod "yn nhraddodiad peth o ganu gorau Cymru, o gynildeb enbyd Llywarch Hen i dlysni angerddol y penillion telyn."
Aeth o ddim i goleg yn syth o'r ysgol ond dod yn brentis gyda chwmni trydan Manweb ac yr oedd wedi cwblhau ei wasanaeth cenedlaethol gyda'r fyddin cyn troi ei lygaid ar goleg gan raddio gydag anrhydedd o Adran Electroneg Coleg y Brifysgol, Bangor.
 |
Ychwanegwch eich sylwadau i'r dudalen fan hyn:
|
|
|
|
|
|  | |  | |  | |  | | |  Sôn amdanynt
Rhestr o'r holl lyfrau sydd wedi cael sylw ar BBC Cymru'r Byd.
|
|
|
|  | |  | | |  Gair am air:
Detholiad o ddyfyniadau - ydych chi'n gwybod pwy yw'r awdur?
|
|
|
|
|
|
Llyfrau - gwefan newydd
Teulu Lòrd Bach
Petrograd
Lôn Goed
Silff y llyfrau diweddar
Hanner Amser
Deryn Glân i Ganu 
Awduron Cymru
Roger Boore
Nadolig a Rhagfyr 2008
Dolennau defnyddiol